Komunikaldiak: Eduardo García Matilla

Jende asko izan da Eduardo García Matillaren hitzaldia entzuten. VideoRating programa erabili du, erakusteko Espainian jendeak zer ohitura dituen telebista ikusteko orduan, beti ere Sofres etxeak emandako datuen arabera. Han eta hemen iruzkin barregarriak egin ditu, eta jendeak gogotik egin du barre García Matillaren ateraldiekin.



Hizlariaren iritziz, 2005. urteak aro baten bukaera ekarri zuen. Orain audientziak zatikatzen ari dira etengabe: orain arte mass media izan baditugu, aurrerantzean group media eta self media agertuko dira, taldeei eta gizabanakoei egokituriko komunikabideak.

Aldaketak
Aldaketa horien oinarrian beste aldaketa batzuk daude, García Matillaren ustez, eta hortik target berriak sortzen ari dira, hau da, publiko helburu berriak:

• Populazioa zahartzen ari da.
• Gero eta inmigrazio handiagoa dugu.
• Etxeetan gero eta jende gutxiago bizi da.
• Emakume asko bakarrik bizi dira.

Gizartearen aldaketa horiek ohitura aldaketak dakartzate:

• Haurrek gero eta telebista gutxiago ikusten dute. Aitzitik, denbora gehiago igarotzen dute Interneten eta kontsolekin jolasean.
• Gero eta zine gutxiago ikusten da telebistan, publizitatearen erruz.
• Erreminta berriak sortzen ari dira, eta horien bidez, gazteek denetik bilduko dute aparailu batean: informazioa, filmak, posta elektronikoa, txata, argazkiak eta telebista, besteak beste.

Giro horretan, enpresek hartu beharko dute komunikazioa kudeaketarako erreminta bat gehiago bezala. Zintzotasunez komunikatu beharko dute, eta ez itxurak egiteko. “Gaur egun ez da posible isilik egotea”, esan du, “komunikazioan hutsuneak bete egiten dira. Zuk ez baduzu esaten, beste batek esango du zure ordez”.

Ondo komunikatzeko, baina, baldintza batzuk bete behar dira:

• Komunikatu nahi izatea.
• Zer esana izatea. Horretarako, ona da argumentarioak prestatzea.
• Esan beharrekoa esanda, isiltzea, askotan komunikazio akatsik handienak off the record egiten baitira.